SEBASTIEN ERHARD (2003) 
Bretone tra Esperantio

… aŭ Esperante tra Bretonio. 

 (vidpunkto el unu kunorganizinto kaj iom partopreninto) 

 Kia somero 2003 ja estis! Ĉu bretona ĝi estis, ĉu esperanta? Nu, ambaŭ ! 
"
Esperanto kaj Bretonio, kio estas la rilato ? ", vi certe demandos. 

Unue, en Bretonio, la ĉiusomera evento estas la Internaciaj Renkontiĝoj de Pluezek (Plouézec en la franca kaj Ploueg-Ar-Mor en la bretona). Ĉi-jare, estis jam la 7a okazo de tiu fama Esperanto-staĝo kaj ĝi okazis de la 16-a ĝis la 23-a de Aŭgusto 2003. Ĝin partoprenis ĉ. 150 homoj el deko da landoj, kaj kiel kutime, la etoso estis plej plaĉa : tien revenis keljaj kutimuloj de la staĝo, sed ankaŭ estis pluraj novaj partoprenantoj. Notindas ke, inter la tieaj honoraj gastoj estis Katalin Kovats (kiu zorgas pri la bona tt-ejo www.edukado.net), Anna Lowenstein, verkistino de la fama romano "La Ŝtona Urbo"), Barbara Pietrzak (ĉefjurnalistino de la Esperanto-redakcio de Radio-Polonia). 

Dum la semajno, ĉiumatene okazis kursoj por ĉiaj niveloj, de tutaj komencantoj ĝis la plej lertaj esperantistoj, kiuj verkadis esperantlingve. Kaj posttagmeze, la programo estis pli distra : turismaj ekskursoj en la regiono, informadiko kaj interreto, jogo, fanfaro, ktp. 

Dum la du unuaj tagoj, okazis en la apuda urbo Pempul (fr. Paimpol, bre. Pempoul) grava festivalo pri tutmondaj maristaj kantoj, kaj tiun festivalon partoprenis nia bretona esperanto-koruso Meven. Tiu koruso estas gvidata de Franjo Provost, kiu dumstaĝe okupiĝis pri la kurso por la infanoj kaj ankaŭ kompreneble pri la ĥorkanta ateliero. 

Miaflanke, mi gvidis la atelieron pri teatro, kiu estis fakte enkonduko al la kunmaska teatro Commedia dell’Arte.

La ateliero tre bone okazis kaj ni eĉ prezentis 2 kanvasojn (duonimprovizitajn skeĉojn) dum la lasta vespero. Samvespere, ni ankaŭ havis la plezuron aŭskulti la ĥorkantojn kun la fanfaro, kaj pluraj personoj el la diversaj kursoj (sed ankaŭ la kuiristoj) prezentis diversajn amuzajn skeĉojn. 

 Finfine, la staĝo estis tre agrabla kaj amikeca, kaj preskaŭ ĉiuvespere, post la kulturaj vesperaranĝoj, pluraj el ni iris plu babili kaj festeti ĉe la lokaj trinkejoj de Pluezek kaj de Pempul, aŭ ĉe iu apuda Fest-Noz. 

 Sébastien Erhard (= Henri de Sabates) 2003